Фото: kumanovskimuabeti.mk

Според конечниот извештај од студијата за утврдување на изворите на загадување на воздухот во Куманово, главните причинители на фините честички (PM2.5) се греењето со биомаса, сообраќајот и согорувањето на гориво и остатоци. Студијата, спроведена од лабораторијата AMBICON при Универзитетот „Гоце Делчев“ во Штип, беше дел од проектот „Справување со загадувањето на воздухот“. Истражувањето е дел од пошироката иницијатива финансиски поддржана од Шведска, а има за цел да помогне во планирање и имплементација на ефективни политики и мерки за унапредување на квалитетот на воздухот.

Клучни наоди:

• Греењето со биомаса е најголем извор на PM2.5, кој на годишно ниво изнесува 31 %. Во зимските месеци овој извор достигнува и до 58,8 % од вкупните емисии, со концентрации што значително ги надминуваат дозволените граници.
• Сообраќајот е втор најзначаен извор (25 %), со константни емисии во текот на целата година, кои вклучуваат издувни гасови, емисии од гуми и кочници.
• Согорувањето на гориво и нафта (17 %) и отвореното согорување на отпад и земјоделски остатоци (11 %) исто така имаат значителен удел.

Препораки:

• Замена на старите печки со еколошки алтернативи (топлински пумпи, гасни котли);
• Подобрување на јавниот превоз и воведување зони со намалени емисии;
• Строги мерки против отвореното согорување на отпад и биомаса.

Оваа студија ја нагласува потребата од координирани акции за подобрување на квалитетот на воздухот, што ќе има директна здравствена и еколошка корист за жителите на Куманово.

Целосниот извештај може да се преземе на следниот линк.