Фото: globi.mk

Според финалниот извештај од студијата за утврдување на изворите на загадување на воздухот во Гостивар, најголем придонес во загадувањето имаат согорувањето на биомаса (26 %) и минерална прашина од градежни активности и патишта (28 %). Студијата, спроведена од лабораторијата AMBICON при Универзитетот „Гоце Делчев“ во Штип, беше дел од проектот „Справување со загадувањето на воздухот“. Истражувањето е дел од пошироката иницијатива финансиски поддржана од Шведска, а има за цел да помогне во планирање и имплементација на ефективни политики и мерки за унапредување на квалитетот на воздухот.

Клучни наоди:

• Дневните концентрации на PM2.5 во Гостивар достигнаа просек од 29,1 µg/m³, што е над дозволениот годишен лимит од 25 µg/m³. Највисоките вредности се забележани во зима, поради греењето со дрва и други цврсти горива.
• Биомасата (огревно дрво) е доминантен извор во зимските месеци, со придонес од 62,7 %.
• Минералната прашина (28 %) е поврзанa со градежни активности и ресуспендиран прав од патишта, особено во сувите периоди.
• Сообраќајот придонесува со 18 %, а отвореното согорување на отпад и земјоделски остатоци со 10 %.

Студијата потврдува дека загадувањето е локален проблем, засилен од метеоролошките услови (слаби ветрови) и антропогените активности. Препорачаните решенија вклучуваат подобрување на системите за греење, контрола на прав од градежни активности и нови зелени површини.

Оваа студија е значаен чекор кон создавање ефективни стратегии за подобрување на квалитетот на воздухот во урбаните средини.

Целиот извештај може да се симне овде